9th Anniversary of Word and Life Church

किनकि परमप्रभु तिमीहरुका परमेश्वरको निम्ति तिमीहरु एक पवित्र जाति हौ । परमप्रभु तिमीहरुका परमेश्वरले पृथ्वीमा भएका सबै मानिसहरुमध्येबाट आफ्नो निम्ति एक विशेष जाति, एक अमुल्य सम्पत्ति बनाउन तिमीहरुलाई छान्नुभएको छ । तिमीहरु संख्यामा अरु जातिहरुभन्दा धेरै भएकाले परमप्रभुले तिमीहरुलाई प्रेम गर्नुभएको वा छान्नुभएको होइन, किनकि तिमीहरु त संख्यामा सबै जातिहरुभन्दा कम थियौ । तर परमप्रभुले तिमीहरुलाई प्रेम गर्नुभएको कारणले, र उहाँले तिमीहरुका पिता-पुर्खाहरुसित गर्नुभएको प्रतिज्ञा पुरा गर्नलाई नै तिमीहरुलाई परमप्रभुले आफ्नो बाहुबलद्वारा निकाली ल्याउनुभयो, र मिश्रका राजा फारोको हातबाट, दासत्वको देशबाट छुटकारा दिनुभयो । - व्यवस्था ७:६-८ 

आफ्नै मातृभूमिले अटाउन नसकेको हामी नेपाली -भाषी भुटानीले २० वर्ष भन्दा बढ्ता समय शरणार्थी जिवनमा बितायौँ । सो अवधिमा हामी अरुबाट सम्हालियौँ: खाद्यान्नको लागि WFP (World Food Program), वास र प्लास्टिकको छानोको लागि LWF (Lutheran World Federation), पढाइमा Caritas Nepal, पानी र स्वास्थ्य उपचारमा अरु विभिन्न संघ-संस्थाहरु, र सुरक्षामा नेपाल सरकारद्वारा सम्हालियौँ । परमेश्वरले नै हामीलाई सम्हाल्न विभिन्न व्यक्ति, संघसंस्था र देशलाई चलाउनुभयो । हामी पक्कै पनि एउटा सम्हालिएका जाति हौँ । धेरै समयसम्म हामी अरुले दिएको कुराहरुबाट जीविकोपार्जन गर्यौं, हामीलाई अरुले सम्हाले । तर अब इतिहास परिवर्तन हुने समय आएको छ । पास्टर निमा घिसिङ्गले भन्नुभएको जस्तै, हामी अब सम्हालिएको जातिबाट अरुलाई सम्हाल्ने जाति बन्नु पर्छ ।

सन् २०१२ मा स्थापित भएको Word and Life Church वर्तमान अवस्थासम्म आइपुग्दा हामी आफै पनि सम्हालिएर, केहि हदसम्म पनि अरुलाई सम्हाल्ने काममा संलग्न भइरहेका छौँ । यस अवधिमा हामीले विगत ६ वर्षदेखि नेपालका विभिन्न ठाउँहरुमा रेडियो कार्यक्रम मार्फत परमेश्वरको वचन प्रचार तथा प्रसारण गरिरहेका छौँ । विगत ३ वर्ष देखि नेपालको राष्ट्रिय Television च्यानल मार्फत हामीले हरेक हप्ता वचनको सेवाकाइ पनि गर्दै आएका छौँ । प्रभुले दिनुभएको मार्गदर्शन अनुसार नै प्रत्येक वर्षको एक पटक, एक महिने गहन बाइबल तालिम: Word and Life Bible School पनि संचालन भइराखेको छ ।

त्यस्तै, प्रभुको अनुग्रहमा Word and Life Church द्वारा समय-समयमा नेपाल तथा भारतका विभिन्न ठाउँहरुमा जाडोमा लगाउने न्यानो लुगा र खाद्यान्न वितरण गरेर ख्रीष्टको प्रेम बाँढ्ने काम पनि भइराखेको छ । यति मात्र नभएर, हामीले धेरै ठाउँहरुमा मण्डली भवन निर्माणको लागि साहयता पनि गरिरहेका छौँ । सन् २०२० मा, महामारीको बीचमा पनि Word and Life Church दुर्गम क्षेत्रहरुमा मण्डलीका पास्टरको जमिनको ऋण तिरिदिन र पास्टर बस्ने घर निर्माण गरिदिन सफल भयो ।

यी सम्पूर्ण क्रियाकलापहरु ख्रीष्टको अनुग्रहमा परमेश्वरले दिनुभएको प्रेम र शक्तिद्वारा नै सम्भव भइराखेको छ । कुनै समय हामीलाई कसैले सम्हाल्दै थियो, तर परमेश्वरले Word and Life Church लाई यति सक्षम बनाउनुभयो कि आज आएर सम्हालिएको व्यक्तिले अरुलाई सम्हाल्ने काम गरिराखेका छौँ । मण्डली परिवार, आउनुहोस्, अब हाम्रो मण्डली नवौं वार्षिकोत्सव मनाउँदै गर्दा आफू पनि सम्हालिएर अरुलाई पनि सम्हाल्ने सेवाकाइमा हामी अझ क्रियाशील होऔं । "तिमीहरुमध्ये थोरैचाहिं हजार हुनेछ, र सबैभन्दा सानोचाहिँ एउटा शक्तिशाली जाति हुनेछ । म परमप्रभु हुँ । त्यसको समयमा त्यो चाँडै पूरा गर्नेछु ।" - यशैया ६०:२२